Sérdeild Sunnulækjarskóla er fyrir nemendur í 1.-10. bekk sem hafa fengið greiningu hjá viðurkenndum greiningaraðilum þar sem mat á umfangi stuðningsþarfa (SIS-C) staðfestir stuðningsþörf. Í undantekningartilvikum er hægt að heimila inntöku nemenda sem eru í greiningarferli hjá viðurkenndum greiningaraðilum og hafa ekki fengið staðfest SIS-C mat.

Nemendur sem sækja um nám við sérdeild Sunnulækjarskóla stunda fullt nám við deildina í samræmi við viðmiðunarstundaskrá og eru skráðir nemendur við Sunnulækjarskóla. Fyrir nemendur sem ekki hafa lögheimili í Árborg er umsókn um námsvist í sérdeild Sunnulækjarskóla jafngild umsókn um námsvist utan lögheimilissveitarfélags. Skal greiðsla fyrir námsvist fylgja gjaldskrá sérdeildar Sunnulækjarskóla sem endurskoðuð er árlega.

Forsjáraðilar í samvinnu við þjónustuteymi eða stuðningsteymi geta sótt um nám í sérdeild Sunnulækjarskóla fyrir börn sem uppfylla inntökuskilyrði. Tekið er við umsóknum allt skólaárið og er það hlutverk skólastjórnenda í grunnskóla nemandans að skila þeim til skólaþjónustu Árborgar í gegnum Signet transfer (sjá hlekk hér að neðan). Greiningargögn, skýrslur og þjónustuáætlun eða stuðningsáætlun nemenda skulu fylgja með umsókninni.