Fréttasafn

Hin árlega upplestrarkeppni 7. bekkja stendur nú fyrir dyrum. 
Undankeppnin í Sunnulækjarskóla var í morgun.  

Lesturinn var frábær og lásu nemendur bæði sögubrot og ljóð.
Það reyndist þrautin þyngri fyrir dómnefndina að velja fulltrúana úr hópi frábærra lesara.

Arndís Hildur Tyrfingsdóttir, Guðbjörg Ósk Ómarsdóttir, Ólöf Eir Jónsdóttir og Þorkell Ingi Sigurðsson voru valin sem fulltrúar skólans í Stóru upplestrarkeppninni.

Mánudaginn 14. mars munu þau keppa í Hveragerði fyrir hönd Sunnulækjarskóla við nemendur úr öðrum skólum á svæðinu.

Við óskum þeim góðs gengis í Hveragerði.

Sunnulækjarskóli varð í fyrsta sæti í flokki skóla með 400 nemendur og fleiri í Lífshlaupinu.

Nemendur skólans hreyfðu sig að meðaltali í 481 mínútu og er það talsvert betri árangur en þeirra sem næstir koma.

Um leið og við óskum nemendum til hamingju með sigurinn þökkum við foreldrafélaginu fyrir styrka stjórn á þátttöku skólans í Lífshlaupinu.

Sjá nánar á lifshlaupid.is

Þriðjudagurinn 22. febrúar, er starfsdagur í Sunnulækjarskóla. Þennan dag munu kennarar nota til að ganga frá námsmati miðannar. Nemendur mæta því ekki í skólann þann dag.

Námsmatsblöð miðannar verða send heim með nemendum miðvikudaginn 23. febrúar og raða foreldrar námsmatinu í námsmatsmöppurnar sem þegar eru til á heimilum.

Foreldrar og nemendur mæta í viðtöl fimmtudaginn 24. febrúar. Fundarboð með nákvæmri tímasetningu viðtala verður sent heim. Nemendur mæta með foreldrum sínum í viðtölin en eru ekki í skólanum þann dag að öðru leyti.

Nemendafélagið ætlar að selja kaffi, kakó og vöfflur til styrktar félaginu. Þar sem ekki er unnt að taka við greiðslukortum biðjum við foreldra að hafa með sér lítilræði af peningum til að kaupa sér hressingu af nemendum.

Í 1. bekk Sunnulækjarskóla snérist dagur stærðfræðinnar um stærðfræðispil og leiki. Nemendur fóru í leiki og spiluðu Löngu vitleysu, Millu og Skrafl.

Stjörnufræðivefurinn færði Sunnulækjarskóla stjörnunsjónauka að gjöf nú í vikunni.  Með sjónaukanum fylgdi einnig heimildarmyndin Horft til himins og veglegt tímarit Stjörnuskoðunarfélags Seltjarnarness.

Við þökkum kærlega fyrir höfðinglega gjöf og vonum að okkur takist með henni að vekja áhuga nemenda á geimvísindum.

Við fengum góða gesti í síðustu viku fyrir jólafrí. Þá komu hér eldri borgarar í Árborg að kenna 8.bekkingum félagsvist og spila við þau.  Þetta er afskaplega gott framtak og til fyrirmyndar.  Eins og sjá má á myndunum vantar ekki áhugann hjá spilafólkinu.

Hér er myndband af söngstundinni.

Nú eru nemendur skólans í óða önn að undirbúa jólaskemmtunina.  Í morgun var generalprufa á helgileiknum sem 4. bekkur setur á svið.  Foreldrum var boðið að koma og sjá og var mjög vel mætt.

Í síðustu viku var kertasund í öllum sundtímum.  Þá synda nemendur með logandi kerti í sundlauginni og hlusta á jólalög.  Mikil stemming var í sundlauginni þegar kertaljósin spegluðust í gáróttu vatninu.

Nemendur í 8., 9. og 10. bekk Sunnulækjarskóla mættu í smákökumaraþon í skólanum s.l. fimmtudagskvöld og bökuðu smákökur allt hvað af tók.

Að loknum bakstrinum voru komnar um 5.500 smákökur.  Nemendurnir færðu síðan eldri borgurum í Grænumörk, dvalargesturm í Vinaminni, Selfosskirkju og félagsþjónustu Árborgar kökurnar að gjöf með góðum óskum um gleðileg jól.

Óhætt er að segja að framtakið gladdi bæði gefendur og þiggjendur og skapar samstöðu og hlýhug í anda jólanna.

Sérstakir vinadagar eru í Sunnulækjarskóla á hverju ári og hefjast þeir yfirleitt í byrjun desember.  Þá eru mynduð vinatengsl milli eldri og yngri nemenda skólans.

Í dag var skreytingadagur í Sunnulækjarskóla.  Dagurinn hófst með sameiginlegri söngstund í Fjallasal en síðan gengu nemendur til þess verks að búa skólann í jólabúning. 

Allt jólaskrautið sem safnast hefur frá fyrri árum var dregið fram og því komið fyrir á þeim stöðum sem vera ber auk þess sem mikið var föndrað og framleitt af nýju skrauti.